"Dampa bial by election campaign neih mekah pawh ZPM sorkar hian dan an bawhchhe nasa hle a ni. Dan bawhchhiat hi engah mah an ngai lo ni hialin a lang a, a pawi hle a ni," a ti bawk.

Robert Romawia chuan, "Dampa mipui zingah ZPM hlawkpui an awm lo. ZPM hian buhfai man a letin an ti to a, electric bill a an ti sang nasa hle bawk a, Dampa bial kawng a chhe em em bawk a ni," a ti a. 

"Dampa bial mipuite hian ZPM sorkar hian engmah tak tak an ti thei lo tih hria se ka duh a. Dampa bial mipuite hian Dr R Lalthangliana, mithiam leh Central lamah pawh a ngaihna hre tur, he bial harsatna tak tak lak aṭanga phurchhuak thei tur an thlan tlin hi a ṭul hle a ni," a ti bawk.

 "Hmunphiah leh sawhthing lei leh hralh chungchangah pawh ZPM sorkar a hlawhchham chiang hle. Sawhthing leinaah vaibelchhe 4 chuang sum a chingpen thute kan hria a, chhui chiangin thil dik lo titu hrem thuai se kan duh hle a. Hmunphiah chungchangah pawh kuthnathawktute an tibeidawng hneh hle a, Mamit district hmunphiah Farmers ten Sorkar rate in hmunphiah man an tel lo nasa a, a pawi tak zet zet a ni," Robert Romawia chuan a ti.

MNF Ṭhalai President chuan ṭhalaite MNF Party zawm turin a sawm a. "FCAA 2023 chungchangah kan ram hralh a ni a. Kan ram hralh a ni hian ṭhalai tam tak ram leh hnam hmangaihna kawngah a kaiharh tih ka hria a. Hawh u, Zoram ṭhalaite u, kan ram leh hnam chhan tur hian lungrual takin hma lam pan ila, do ngai do ila, thawh ngai thawk ang u," a ti bawk.

An chhung inkhawm hi Rochhunga Ralte ex MLA, Adviser-in a kaihruai a, Lalruatkima, Treasurer-in FCAA 2023 duh lohna bandh mipuiin an thlawp ṭhat avanga lawmthu sawina hun a hmang.